磕头呒救

秦山东南佬有个毛六十岁的半老太婆，伊个男人叫阿龙，大家材喊伊龙嫂嫂。龙嫂嫂大面大孔大号头，挑得背得吃得困得，手脚来讪心肠热，隔壁邻舍啥人家有事体，伊要么勿晓得，一晓得，掼脱自家生活去相帮；尤其是烧香问师娘，啥污荡老爷灵，啥污荡师娘准，龙嫂嫂馋吐水开花，讲起来有头有脑有名有姓，熟门熟路相帮陪去问阴堂。

龙嫂嫂老小才搭，人缘好，但也有人看勿惯。啥人？讲出来侬可能勿相信，伊个媳妇巧铃对伊意见大来勿得了。巧铃性格内向型，像大庙门口头石狮子------死勿开口，婆媳妇两个倒也勿成当面争过。龙嫂嫂要面子，看见巧铃勿开心，想到老古话，若要好大做小，千方百计讨好上去。啥人晓得，巧铃像是个木人头，猪毛啸勿进一根。热面孔贴冷屁股，龙嫂嫂肚里气来海万，勿晓得自家错勒嗄滩。

其实，巧铃跟龙嫂嫂的矛盾，原因还出勒龙嫂嫂身佬厢，伊烧香化元宝实在相信，弄得屋里厢雪雪白的墙壁氽得墨赤黑。婆婆是长辈，巧铃要讲也勿敢当面讲，碰着自家男人一直跑勒外头打工，呒白话呒商量，一个人缩房间里眼勿见，清爽点。

一日夜快头，龙嫂嫂田里生活尴尬头，做到墨赤墨暗回转去，一看，清水盖，冷镬头。望望巧铃房间里有灯光。鸽甲摹甲蟹摹甲，夜饭勿烧？换别个婆阿妈，肯定要出佬阪。龙嫂嫂人好，来到巧铃房间，只见巧铃冒头冒脚困勒嗨，看样子总有啥勿适意。

龙嫂嫂勿忧勿响退出去，烧好饭盛勒拿到巧铃房间里，巧铃却勿领情，讲肚皮有眼痛滋滋，难过得勿得了，一眼吃勿落。龙嫂嫂想：肚皮疼，小事体，也有可能生小弟弟。龙嫂嫂吃好夜饭收作好，又来到巧铃房间，喊了好几声，巧铃才喉咙头转气回一声。龙嫂嫂门一关，掘起屁股朝西南佬一卷。

龙嫂嫂做啥去？买药？请医生？材勿是。伊到张家厍去寻眼晴大瓣小的张师娘。问问张师娘巧铃到底是啥原因？张师娘马上点香上堂，话鬼话讲：巧铃下班回转来，脚踏车笼头一歪，正巧劈面跟公阿爹阿龙撞一记，动勒胎气；阿龙桄火来，要是换别人撞伊，伊肯定勿买账，回转去快点多本点银子伊，材是自家人总好讲个；另一个回去拿房窗开拉嗨，半夜靶我跑一埭，保证让哪媳妇明朝照常上班。龙嫂嫂头得来像夜壶，请张师娘出把大力，摸出一张五十块头，张师娘假做勿吃猪头肉，推了推，老早一把捏到手心里，讲：太客气太客气，那我勿出客勒，勿过要是换别人，打底一百只洋，老熟客，雅麽尚，雅麽尚。

龙嫂嫂回到屋里，急忙烧了八样头，过了个时酒，烧香化元宝，忙了半夜，去看看巧铃，巧铃面孔煞白像个死人，喊来喊去喊勿醒。龙嫂嫂吓得差一眼卵子上楼，及屁五个化跑出去喊人。半夜三更夜惊大，落起一帮人，七手八脚要要紧紧拿巧铃送出去。到医院，龙嫂嫂及喊号少号少。医生一看，拟话勿讲，马上抢救。但只一歇歇辰光，巧铃被推出来了，医生对龙嫂嫂讲：“驮来太迟了！要是早送来一个钟头……”龙嫂嫂一听，晓得拆烂污勒，再看看清爽，好像巧铃翘辫子勒，吓得魂灵出窍，拨独一声滾到地佬，别立白勒对医生穷磕头，及叫：“医生救救，菩萨救救，救救吾那巧铃，求求侬！……”医生长两手一摊，讲：“磕头呒用够，磕头磕得好，要医院来做啥？怪只怪哪自家，哪真驮来太迟勒，迪个病人是宫外孕大出血，错板勿起候呀。”龙嫂嫂一听，错一眼一口气愁勿转，跟媳妇一道去。

龙嫂嫂醒转来，跳起身一路跑到张师娘屋里，一把掀翻了香堂。现在，龙嫂嫂逢人就讲：烧香呒没用，磕头呒没用，迷信害煞人！

后记：陆老师的方言故事，将用于制作方言故事音像版，以保留本地方言口语的表现风格